Zvicra rrit shumën e ndihmës për zhvillim

Kjo shumë, e shpërndarë në katër vitet e ardhshme, do të jetë 11.35 miliardë franga, ose 0.5% e brutoproduktit të Zvicrës

Dhoma Nacionale e Parlamentit të Zvicrës është shprehur në të mirë të rritjes së shumës së ndihmës për zhvillim që jep Zvicra për vendet e varfra. Kjo shumë, e shpërndarë në katër vitet e ardhshme, do të jetë 11.35 miliardë franga.

Gjatë debatit në parlament, SVP-UDC bëri përpjekje që këtë shumë ta zvogëlojë në 9.6 miliardë franga, por dështoi, meqë shumica e madhe e deputetëve (123 pro, 49 kundër dhe 5 të përmbajtur) votoi për shumën e parë.

Kredia e miratuar prej 11.35 mrd frangash i përgjigjet 0.5 për qind të bruto prodhimit nacional të Zvicrës. Parlamenti,  në legjislaturën e tij të kaluar, para një viti e gjysmë, kishte vendosur që kjo përqindje (0.5) e ndihmave për zhvillim të realizohej në vitin 2015. Me këtë rritje, Zvicra është në mesataren e vendeve të OECD-së sa u përket ndihmave për zhvillim.