Marrëveshje mbi tatimet, me tri shtete

Megjithatë, mbetet i diskutueshëm kalimi i kësaj marrëveshjeje në parlamentin gjerman

Të dy dhomat e Parlamentit të Zvicrës kanë miratuar marrëveshjet në fushën e tatimeve me Gjermaninë, Britaninë e Madhe dhe Austrinë. Në këtë kuadër ato janë pajtuar edhe për tatimin e ashtuquajtur të zhdëmtimit.

Kjo nënkupton që përmes pagesës së këtij tatimi, paraja e pataksuar e bankave që ka burimin nga vendet e lartshënuara, të legalizohet retroaktivisht. Tri vendet e përmendura, pas kësaj marrëveshjeje, do të marrin nga Zvicra pagesa të menjëhershme dhe po ashtu edhe një tatim zhdëmtues vjetor mbi kamatat e shteasve të tyre që kanë kursyer në bankat zvicerane.

Në të njëjtën kohë, emrat e personave nga ato vende do të mbeten anonime. Po kështu marrëveshja mundëson që bankat zvicerane të kenë një qasje më të mirë në tregun financiar të këtyre shteteve.

Megjithatë, bazuar në reagimet e partisë opozitare gjermane SPD, kalimi i kësaj marrëveshjeje në parlamentin gjerman është në pikëpyetje të madhe.