Bled Bujupi editoi videon e prezantimit të Sanchezit në Manchester United

Skuadra e madhe angleze, Manchester United, ia ka besuar një shqiptari nga Kosova editimin final të videos së prezantimit në klub të Alexis Sanchez.

Regjisori kosovar, Bled Bujupi, ka punuar edhe më herët me ekipin anglez. Detajet e kësaj videoje të jashtëzakonshme janë finalizuar nga regjisori dhe montazheri kosovar, Bledar Bujupi. Ai jeton dhe punon në Mançester, është thirrur të dielën pasdite nga gjiganti botëror i futbollit, Manchester United, për një punë sekrete, raporton “KTV”.

Në stadiumin “Old Trafford” ndodhej ylli kilian i futbollit, Alexis Sanchez, me të cilin do të xhirohej dhe më pas montohej videoja e prezantimit, përcjell albinfo.ch.

Bujupi ka punuar me regjisorin Ben Thornleyn, të kompanisë Mob, për të përfunduar videon në të cilën Sanchez e luan në piano himnin ‘Glory Glory Man United’.

Për 24 orë videoja e prezantimit të Sanchezit është parë më shumë se 20 milionë herë në të gjitha rrjetet sociale.

“Isha shumë krenar dhe i privilegjuar kur më kërkuan ta bëj këtë punë. Që videoja e prezantimit të një prej lojtarëve kryesorë në Premier League t’i besohet një montazheri kosovar, është një privilegj i madh. Ka pasur shumë presion për këtë punë, por videoja finale është pritur shumë mirë nga tifozët e Manchester United në mbarë botën”, ka thënë Bujupi për KTV-në.

Ai ka shtuar se në secilën punë që e bën provon të jetë ambasador i Kosovës dhe të dëshmojë para botës për talentin e madh që njerëzit nga këtu kanë.

Më herët Bujupi gjithashtu e ka punuar edhe videon e prezantimit të Paul Pogbas në Manchester United. Ai bashkë me familjen e tij kanë shkuar si refugjatë nga Kosova në Angli, në vitin 1999.

https://koha.gjirafa.com/?video=shqiptari-editon-videon-e-prezantimit-te-sanchezit-tek-unitedi