Brenda 4 muajve shuhen 269 biznese në Kosovë

Shuarja e bizneseve në Kosovë duhet të jetë sinjal alarmues për institucionet kosovare, thonë njohës të çështjeve ekonomike

Sipas tyre, me shuarjen e bizneseve, po shuhen shumë vende të punës, çka rrjedhimisht ndikon edhe në rritjen e shkallës së varfërisë në vend.

Haki Shatri, ekspert i çështjeve ekonomike, thotë se dukuria e falimentimit të bizneseve në Kosovë është shkaktuar nga ambienti i pafavorshëm biznesor, mungesa e kapitalit qarkullues dhe problemet që janë paraqitur në ngrirjen e fondeve publike, raporton ReL.

Përfaqësuesit e Ministrisë së Tregtisë dhe Industrisë, konfirmojnë se që nga fillimi i këtij viti deri më tani, në Kosovë janë regjistruar 3,385 biznese, dhe prej tyre janë shuar 269.

Zëdhënësja e Ministrisë së Tregtisë dhe Industrisë, Arta Istrefi tha se sipas agjencisë për regjistrimin e bizneseve në kuadër të Ministrisë së Tregtisë dhe Industrisë, nga 1 janari i këtij viti, deri më 24 mars, janë regjistruar 3,385 biznese, ndërsa janë shuar 269 prej tyre.

Për të eliminuar këtë dukuri të shuarjes së bizneseve, Istrefi bën të ditur se në Ministria e Tregtisë dhe Industrisë ka bërë reformat të shumta.

Ajo thotë se është eliminuar leja e punës, është reduktuar numri i dokumenteve për eksport – import, që janë nevojitur deri në 8 dokumente, ndërsa tani nevojiten vetëm dy dokumente.

Po ashtu, njëra nga lehtësirat që iu është bërë bizneseve, thekson Istrefi, ka të bëjë edhe me regjistrimin e bizneseve, i cili tani bëhet pa pagesë.

Falimentimi i bizneseve ka pasoja të mëdha në ekonominë e Kosovës, thotë Haki Shatri. Për këtë, sipas tij, duhet të merren masa konkrete.

Falimentimi i një firme, përveç tjerash, siç thotë Shatri, rritë papunësinë në Kosovë.

Ndryshe, ekspertët e ekonomisë thonë se edhe kamatat e larta mund të vlerësohen që janë njëra ndër barrierat që çojnë në vështirësi të mëdha, dhe të cilat mund të jenë si faktorë kontribuues në falimentimin apo krijimin e vështirësive të shumë ndërmarrjeve, qofshin ato të mesme, të vogla apo edhe të mëdha.