Rritja e pagave, e kundërligjshme dhe ndërhyrje në kompetencat e Kuvendit

Instituti i Kosovës për Drejtësi ka analizuar vendimin  e Qeverisë Haradinaj për ngritjen e mirëqenies ekonomike të një kategorie të pozitave të kabinetit qeveritar, përfshirë ngritjen e pagës së kryeministrit, zëvendëskryeministrave, ministrave, këshilltarëve dhe një kategorie të shërbyesve civilë.

“Vendimi i Qeverisë tejkalon kompetencat e përcaktuara me ligj dhe me Rregulloren e Punës së Qeverisë, e cila në asnjë dispozitë të saj nuk përcakton kompetencat dhe përgjegjësitë e Qeverisë për caktimin e pagave apo kompensimit për kryeministrin apo ministrat. Në bazë të Kushtetutës dhe ligjit të aplikueshëm në Kosovë, kompetentë për të vendosur lidhur me pagat e funksionarëve të lartë publikë në Kosovë, veçanërisht për pozitën e kryeministrit dhe ministrave, është Kuvendi i Kosovës. Prandaj, ky vendim është i kundërligjshëm dhe ndërhyrje arbitrare e drejtpërdrejtë në kompetencat e Kuvendit të Kosovës”, thuhet në këtë analizë të IKD-së.

Sipas këtij Instituti, vendimi i miratuar nga Qeveria Haradinaj përveç që është bërë në kundërshtim me ligjin e aplikueshëm, i njëjti është bërë pa analizë ligjore adekuate dhe pa vlerësim apo konsultim lidhur me ndikimin financiar që ky vendim ngërthen në vete për buxhetin e pushtetit ekzekutiv dhe pushtetin gjyqësor. Duke marrë për bazë numrin aktual dhe numrin e pozitave të lejuara për gjykatës dhe prokurorë dhe pozitave të tjera në sistemin gjyqësor dhe prokurorial, pagat e të cilave janë të lidhura drejtpërdrejt me pagat e kabinetit qeveritar, numri kalon 650 pozita, që brenda një viti kalendarik ka ndikim të madh financiar, e që mund të llogaritet në disa miliona euro.