18 muaj burg për zviceranen: Kishte provuar t`i bashkohej ISIS-it bashkë me djalin 4 vjeçar

Dënimi i është shqiptuar pasi që është konstatuar se në vitin 2015 ishte nisur për të shkuar në Siri së bashku me të birin e saj 4 vjeçar për t`iu bashkuar ISIS-it

Keystone

Një zvicerane, sot 31 vjeçe, e konvertuar në islam, është dënuar sot nga Gjykata Federale Penale e Zvicrës në Bellinzona me 18 muaj burg, 6 prej tyre burg efektiv. Dënimi i është shqiptuar pasi që është konstatuar se në vitin 2015 ishte nisur për të shkuar në Siri së bashku me të birin e saj 4 vjeçar për t`iu bashkuar ISIS-it, shkruan srf. Ajo është dënuar konkretisht për  veprën penale:  shkelje të ligjit federal mbi ndalimin e grupeve terroriste si “Al Kaida” dhe “Shteti Islamik”, transmeton albinfo.ch.

Në sallën e gjykimit ajo sot është paraqitur me mbulesën myslimane të grave.

Prokuroria Federale kishte kërkuar një dënim me heqje lirie prej 24 muajsh pa kusht. Dhe këtë kërkesë e kishte mbështetur me të dhënën se e akuzuara ishte e patundshme në qëllimin e saj për t`iu bashkuar ISIS-it dhe në këtë qëndrim të saj ajo ka promovuar organizatën e përmendur terroriste duke u shndërruar vetë në kërcënim (në kuptimin që e shpjegon ligji kundër organizatave të përmednura terroriste).

Veç kësaj, zvicerania nga Winterthuri, e konvertuar në islam, ka rrezikuar edhe jetën e të birit të saj të vogël, tranmseton albinfo.ch. Ai nuk mund të vendoste për veten por ishte i detyruar t`i shkonte pas nënës së tij në një rrugëtim të rrezikshëm për jetën, me trafikantë dhe nëpër Detin Mesdhe në kohë dimri.

Për më tepër ajo ka promovuar edhe propagandën e ISIS-it në shtetet perëndimore me faktin se ka miratuar në parim aktet terroriste të realizuara në perëndim nga organizatat islamike.

Nga ana tjetër, mbrojtja ka kërkuar lirim nga akuza, pasi që sipas saj, nuk është konstatuar që e akuzuara të ketë bërë thirrje për dhunë.