Përfundon greva e të burgosurve, pranohet kërkesa e tyre për dhomën “e kontakteve intime”

Ndërkohë, drejtori i burgut ka bërë të ditur se është pranuar kërkesa e grevistëve për t`ua siguruar dhomën e përmendur. Kërkesat tjera të tyre nuk janë pranuar

Keystone

50 të burgosur nga gjithsej 180 persona sa vuajnë dënimin në burgun Thorberg afër Bernës, nga 17 nëntori kanë qenë në grevë. Siç ka shkruar tashmë albinfo.ch, ata kishin kërkuar tu lejohej një dhomë për kontakte intime, t`u shtoheshin të ardhurat dhe ushqimi.

Ndërkohë, drejtori i burgut, Thomas Egger ka bërë të ditur se është pranuar kërkesa e grevistëve për t`ua siguruar dhomën e përmendur. Kërkesat tjera të tyre nuk janë pranuar nga drejtoria e burgut.

Tetë udhëheqësit e grevës janë izoluar nga grevistët tjerë, në reparte tjera, transmeton albinfo.ch. Ndërsa grevistët tjerë janë mbyllur në qelitë e tyre dhe nuk kanë të drejtë qasjeje në mediet elektronike. Por, ata mbajnë të drejtën për qëndrim njëorësh në ajër të pastër.

Këto masa përfundojnë të hënën (sot) ka thënë Egger. Kështu, në mëngjesin e të hënës janë paraqitur në punë të gjithë të burgosurit, pa përjashtim. Atmosfera në mes të të burgosurve ka qenë e qetë.