Lobim me organizatat ndërkombëtare në Gjenevë

Zëvendësministri i Punëve të Jashtme të Kosovës, Petrit Selimi takoi udhëheqës të organizatave ndërkombëtare në Gjenevë

Në një vizitë njëditore në Gjenevë, ku gjenden selitë e një numri të madh të agjencive dhe organizatave ndërkombëtare, zëvendësministri i Punëve të Jashtme të Kosovës, Petrit Selimi ka takuar zyrtarë të larte të organizatave me të cilat Republika e Kosovës synon të rris interaksionin dhe komunikimin direkt.

Përveç tjerash, zëvendësministri Selimi është takuar me Laura Thomson, zëvendësdrejtore e organizatës për migrim IOM. Thomson ka përcjell me vëmendje shpjegimet e Selimit për zhvillimet e fundit në Kosovë dhe afrimin e Kosovës në organizatat multilaterale.

Thomson po ashtu ka shprehur gatishmëri për të vazhduar bisedat e thella me përfaqësuesit e Kosovës në afrimin e mëtejmë deri tek mundësia e aplikimit për anëtarësim.

Zëvendësministri Selimi po ashtu ka takuar edhe Organizatën Ndërkombëtare të Punëdhënësve dhe ka biseduar për mundësinë që federatat kosovare të punëdhënësve të jenë të inkuadruara në këtë agjenci ndërkombëtare.

Selimi po ashtu ka takuar edhe disa agjenci të OKB-së ku Kosova deri më tani nuk ka pasur qasje direkte.

Gjatë qëndrimit të shkurtë në Gjenevë, zëvendës ministri Selimi po ashtu ka mbajtur një ligjëratë në Geneva School of Diplomacy, thuhet në një komunikatë të Ministrisë së Punëve të Jashtme.