Ka vjedhur 138 vetura, kapet shtetasi i Maqedonisë

Hetuesit në Vjenë supozojnë se veturat janë transportuar drejt Serbisë, Kroacisë ose Kosovës

　Një qytetar i Maqedonisë, është kapur nga policia austriake pasi që dyshohet se ka vjedhur një numër rekord veturash: plot 138 sish dhe të gjitha në Vjenë! Policia austriake, që e ka kapur të dyshimtin, konsideron se 50 vjeçari nga Maqedonia (përkatësia etnike e të cilit nuk bëhet e ditur) është pjesë e një　bande çeke për vjedhjen e veturave qëmë pas　dërgoheshin në vende të Evropës lindore.

　Banda në fjalë ishte specializuar kryesisht për automobilat VW Golf dhe Skoda, me ngjyrë të errët, ka thënë ministrja e punëve të brendshme e Austrisë Johanna Mikl-Leitner në një konferencë shtypi të mbajtur enkas për këtë rast të hënën në Vjenë.

　Hajni i veturave është kapur falë një shprehie të tij, thonë mediet austriake: Ai për çdo mbrëmje vendosej në një hotel të kategorisë së ulët në qarkun e 17 të Vjenës. 　

Pastaj, rreth orës 2 pas mesnatës, me një biçikletë, ku mbante veglat që i nevojiteshin, fillonte hulumtimin e veturave që i interesonin. Pasi i hapte ato, i bartte dhe i vendoste në një vend të caktuar. Të nesërmen e merrte veturën e vjedhur dhe nisej me të për në Çeki.

　Policia vlerëson se me vjedhjen e 138 makinave, 50 vjeçari ka shkaktuar dëm prej më shumë se 500 mijë eurosh. Me rastin e kontrollimit të dhomës së hotelit atij i janë gjetur vegla profesionale që përdorin automekanikët, dhe dokumente çeke të veturave.　

Hetuesit supozojnë se veturat e vjedhura, janë transportuar pastaj drejt Serbisë, Kroacisë ose Kosovës.