Jep dorëheqje kryetari i BDP-së, Grunder

"Partia është rritur. Udhëheqja tashti duhet të jetë me bazë më të gjerë", ka thënë Hans Grunder

Kryetari i partisë BDP, Hans Grunder ka paraqitur dorëheqjen nga posti i tij partiak për fillim të muajit maj. Siç shkruan gazeta “SonntagsZeitung”, Grunder, këtë lajm ia ka kumtuar javën e kaluar në mënyrë të papritur kryesisë së partisë së tij.

“Partia është rritur. Udhëheqja tashti duhet të jetë me bazë më të gjerë dhe prezantimi i partisë nuk duhet të mbetet vetëm çështje e dy figurave”, ka qenë arsyetimi i tij për dorëheqjen.

Grunder ka qenë kryetar i BDP-së që nga themelimi i partisë, në vitin 2008. Kjo parti ka lindur si rezultat i përçarjes në SVP-UDC, pas zgjedhjes në vitin 2008 të ministres Eveline Widmer –Schlumpf në qeveri, kundër vullnetit të ish partisë së saj, SVP-UDC-së.

Si pasardhës i mundshëm i Grunder-it nga burimet brendapartiake konsiderohet deputeti nacional nga Glarusi, Martin Landort. Udhëheqja e re e partisë do të zgjidhet më 4 maj.