VV në Cyrih thërret diasporën të marrë pjesë masive në zgjedhje

Deputeti Dardan Molliqaj është shprehur se ata nuk mund të premtojnë se Kosovën do ta bëjnë si Zvicra por ka thënë se do të punojnë që Kosovën ta bëjnë shtet ashtu si duhet të jetë një shtet

Drejtuesit e Lëvizjes Vetëvendosje kanë vazhduar fushatën për zgjedhjet e 22 tetorit edhe në Zvicër. Në lokalin “Labor Bar” në qytetin e Cyrihut drejtuesit e kësaj partie kanë thënë se një nga mundësitë më të mira për ta ndihmuar mërgatën nga ky vend është krijimi i një avio-kompanie shqiptare.

Kreu i VV-së, Visar Ymeri, ka thënë se ata e mbështesin idenë e Kryeministrit të Shqipërisë, Edi Rama, për ta krijuar një avio-kompani shqiptare e cila do ta ndihmonte në masë të madhe mërgatën dhe, sipas tij, kjo do të zgjidhte problemin me bileta me çmime të larta.

Drejtuesit e VV-së u kanë bërë thirrje të pranishmëve që të votojnë në mënyrë masive në zgjedhjet lokale të Kosovës sikurse në zgjedhjet e 11 qershorit edhe në zgjedhjet e ardhshme.

Deputeti Dardan Molliqaj është shprehur se ata nuk mund të premtojnë se Kosovën do ta bëjnë si Zvicra por ka thënë se do të punojnë që Kosovën ta bëjnë shtet ashtu si duhet të jetë një shtet.