Protestë kundër dëbimit të familjes rome në Kosovë

Protestuesit janë kundër kohës në të cilën po zhvillohet ky riatdhesim, kur në Kosovë, "temperaturat kanë zbritur deri në minus 30 gradë"

Valës aktuale të dëbimit të refugjatëve kosovarë nga Gjermania, kryesisht romë, është duke iu dhënë publicitet i madh në mediet gjermane. Ato pasqyrojnë në hollësi aksionet e policisë për kapjen e këtyre njerëzve, shumica e të cilëve jetojnë prej më shumë se dhjetë vitesh në Gjermani.

Një pjesë e shoqërisë civile të regjioneve ku bëhen këto dëbime, bashkë me aktivistë politikë, kanë organizuar protesta kundër dëbimit. Në veçanti, ata janë kundër kohës në të cilën po zhvillohet ky riatdhesim, kur në Kosovë mbretëron një mot siberik, “me temperatura deri në minus 30 gradë”.

Një protestë e tillë është zhvilluar të martën në Aeroportin e Dyzeldorfit. Siç shkruan NWZonline.de, disa shoqata refugjatësh dhe disa parti të landit Niedersachsen, kanë protestuar sërish kundër dëbimit të romëve në Kosovë. Në një pankartë të madhe ata kanë shkruar: “E drejtë qëndrimi për të gjithë refugjatët”.

Natën në mes të të hënës dhe të martës, çifti Berisha nga Friesoyte është kapur pa paralajmërim dhe nga Dyzeldorfi është transportuar me aeroplan në Kosovë, njofton këshilli i refugjatëve të Niedersachsenit. Kjo, me gjithë faktin se ky çift që jetonte prej 23 vitesh në Gjemani, kishte afat toleromi (Duldung) deri të enjten.

Ramiz Berisha (58 vjeç) dhe bashkëshortja e tij Fatmirja (53) jetonin, sipas këshillit të refugjatëve që nga viti 1988 në Gjermani. Ramizi, për shkak të një sëmundjeje të rëndë ndodhej vazhdimisht nën trajtimin mjekësor. Përpjekja e avokatit të familjes që përmes një ankese në Gjykatën Administrative të Oldenburtgut të pengonte dëbimin e Berishëve, dështoi.

Nga ana tjetër, autoritetet e landit thirren me këtë rast në të drejtën e tyre që ua jep ligji. Ato, në korrikun e vitit të kaluar ia kishin hedhur poshtë çiftit Berisha kërkesën për leje të qëndrimit në Gjermani. Me këtë akt, sipas autoriteteve, çifti është dashur ta kishte të qartë se së shpejti duhej pritur një aksion për dëbim. Po kjo u është komunikuar atyre edhe një herë,në fillim të janarit.