Bazel: 110 mijë veta festojnë 1 Gushtin me fishekzjarrë

Sipas njoftimeve të bëra nga autoritetet e sigurisë, festa është mbajtur nën masa më të ashpra sigurie se zakonisht

Keystone

Rreth 110 mijë veta në Bazel në mbrëmjen e të hënës i janë gëzuar ndezjes së fishekzjarrëve për nder të 1 Gushtit, festës nacionale të Zvicrës. Rreth orës 23 nga dy anije të ndalura në lumin e Rajnës janë hedhur në ajër mijëra fishekzjarrë.

Në brigjet e Rajnës, restorante të shumta, stenda me mallra të ndryshme dhe muzika kanë krijuar një atmosferë festive. Sipas njoftimeve të bëra nga autoritetet e sigurisë, festa është mbajtur nën masa më të ashpra sigurie se zakonisht. Në përgjithësi ka rrjedhur pa ndonjë incident që vlen të përmendet.

Qyteti i Bazelit e feston 1 Gushtin zakonisht në mbrëmjen para kësaj date. Pas festës së përmendur të fishekzjarrëve në Rajnë, më 1 gusht mbahet manifestimi zyrtar federal në kodrën Bruderholz.