Deklaratat për “Shqipërinë e madhe” të papranueshme

Komisioneri për zgjerim i BE-së, Johannes Hahn, gjatë një takimi me shefin e diplomacisë serbe, Ivica Daçiq tha se deklaratat për ndryshim kufijsh mund të cilësohen si përzierje në shtetet e tjera, prandaj janë të papranueshme dhe kundërproduktive

Deklaratat e kryeministri shqiptar, Edi Rama dhe të presidentit të Kosovës, Hashim Thaçi  për “Shqipërinë e Madhe” nuk e kërcënojnë Bashkimin Evropian, por janë kundërproduktive dhe të papranueshme për Brukselin. Kështu ka deklaruar komisioneri për zgjerim i BE-së, Johannes Hahn, gjatë një vizite me shefin e diplomacisë serbe, Ivica Daçiq.

“Shpreh zhgënjim dhe nëse mund të them edhe zemërim për shkak të deklaratave nxitëse të disa liderëve në rajon. Deklaratat e tilla, që mund të cilësohen edhe si përzierje në shtetet e tjera dhe implikojnë ndryshime të kufijve, janë të papranueshme dhe për më shumë janë të panevojshme dhe kundërproduktive”, tha Hahn pas takimit me Daçiqin në Bruksel.

Deklaratat e Hahn pasuan intervistën e kryeministrit të Shqipërisë Edi Rama në portalin Politiko në të cilën nuk e ka përjashtuar mundësinë e bashkimit të Shqipërisë me Kosovën, “nëse perspektiva e anëtarësimit të vendeve të rajonit të Ballkanit në BE, vazhdon të zbehet”. I po ashtu edhe presidenti i Kosovës, Hashim Thaçi tha se bashkimi kombëtar është alternativë nëse BE nuk i don shqiptarët.

Johannes Hahn tha se do të ishte e gabueshme të mendohet se me deklarata të tilla “mund të bëhet trysni ndaj BE-së”, për anëtarësim.

“Deklarata e tillë shumë lehtë mund të shkaktojë kundërefekt. Duhet të jemi të vetëdijshëm se evropianët kanë një interes të fuqishëm për paqe, përparim dhe stabilitet në rajon, dhe kjo mund të arrihet vetëm përmes marërdhënieve të mira fqinjësore, ku të gjithë punojnë bashkë dhe ndihmojnë në zhvillimin e mëtejmë të rajonit”, tha Hahn.

Komisioneri për zgjerim i BE-së, Johannes Hahn tha se suksesi i negociatave të Serbisë drejt anëtarësimit në BE varet edhe nga dialogu i Beogradit me Prishtinën.

“Shpresoj se të dyja palët do të tregojnë një qasje konstruktive dhe do të vazhdojnë më tutje me rezultate të prekshme. Jam i bindur se së shpejti do të hapim kapituj të ri dhe duhet të shfrytëzojmë çdo rast që ta mbajmë dinamikën”, tha Hahn.

Por, menjëherë pas kësaj deklarate reagoi presidenti Hashim Thaçi. Ai tha se Bashkimit Evropian ka kohë që i mungon lidershipi dhe se Kosova duhet të njihet nga BE.

“Kjo qasje dëshmon se BE-së, në rastin më të mirë, nuk i bëhet vonë kurrë për Kosovën. Ndërsa, në rastin më të keq, as që do t’ia dijë fare. Diskriminimi dhe izolimi i qytetarëve tanë sot, flet shumë më tepër se deklaratat monotone të disa zyrtarëve të BE-së që përsëriten që nga viti 2000”, tha Thaçi në një deklaratë të tij të postuar në Facebook.

Sipas Thaçit, projekti i Shqipërisë së Madhe është “produkt i propagandës së Serbisë për të realizuar projektin e Serbisë së Madhe, i cili tashmë pothuajse funksionon nën hundën e BE-së”.

“Nuk ka Shqipëri të madhe apo të vogël, por ka vetëm Shqipëri dhe vetëm Kosovë. Dhe do të ishte mirë që edhe BE-ja ta pranojë këtë realitet dhe të fillojë ta trajtojë Kosovën si shtet të pavarur dhe sovran”, tha Presidenti i Kosovës.