Shpendi i prezanton autobusët e rinj të Prishtinës

“Shumë shpejt pritet që të arrijnë pjesa e parë e autobusëve për trafikun urban në Prishtinë”, shkruan Shpend Ahmeti, duke plasuar me kontingjentin e parë të autobusëve “Iveco”

Nga fillimi i vitit të ardhshëm, Trafiku Urban i Prishtinës do të bëhet me autobusët e rinj, të cilët tashmë po presin ardhjen në kryeqytetin e Kosovës. Kontingjentin e parë të këtyre autobusëve e ka plasur në rrjetin social Facebook, edhe kryetari i Prishtinës, Shpend Ahmeti.

“Shumë shpejt pritet që të arrijnë pjesa e parë e autobusëve për trafikun urban në Prishtinë”, shkruan Ahmeti, duke plasuar një foto nga terminali ku po qëndron kontingjenti i parë i autobusëve “Iveco” nga Çekia, që ka fituar tenderin për pajisjen e Trafikut Urban me 51 autobusë të rinj.

Marrëveshja me kompaninë “Iveco” është nënshkruar në shtator ndërmjet Shpend Ahmetit, kryetari i Prishtinës dhe përfaqësuesit të kompaninë “Iveco”. 51 autobusët e rinj do të përdoren për trafikun urban dhe janë të standardit Euro 6.

Sipas marrëveshjes, Kompania “Iveco” do të sjellë autobusët e parë në dy afate: 30 autobusët e parë do të arrijnë brenda 90 ditësh (në fund të dhjetorit) kurse 21 autobusët e tjerë brenda 120 ditësh (në fund të janarit).