FC Thun me Ramën eliminon Vllazninë

FC Thun i Zvicrës e ka bërë “sefte” stadiumin e ri me një fitore ndaj Vllaznisë së Shkodrës. Milaim Rama shënoi golin e parë për Thunin, në minutën e 89, kur Vllaznia po udhëhiqte me rezultat një 1 me 0. Ndërsa vetëm një minutë më vonë Benjamin Lüthi shënoi golin e dytë dhe vulosi fitoren e zviceranëve.

Që në fillim të ndeshjes, në minutën e 14 Xhevahir Sykaj shënon gol për Vllazninë dhe kështu dukej se skuadra shqiptare do të kishte primatin gjatë gjithë ndeshjes. Në fakt FC Thuni e kishte tepër të vështirë të shënonte gol.

Pas rezultatit 0:0 në ndeshjen e luajtur javën e kaluar në Shkodër, dhe fitores së sontme, FC Thun e ka të hapur rrugën për në xhironë e tretë të Ligës Evropiane të futbollit. Ndeshja e radhës është ajo kundër Palermos.