Singapori, shteti i 113-të që njeh pavarësinë e Kosovës

Singapori është shtet në Azinë Juglindore dhe ka popullsi prej 5.7 milionë banorësh. Singapori është shteti i katërt nga ASEAN që ka njohur pavarësinë e Kosovës

Pas një heshtje disa mujore, Republika e Kosovës e merr njohjen e 113 nga shteti i Singaporit. Lajmin e ka konfirmuar për mediat lokale në Prishtinë, ministri i Punëve të Jashtëm, Enver Hoxhaj. Singapori është shteti i katërt nga ASEAN që ka njohur pavarësinë e Kosovës.

Në letrën e njohjes, thuhet se “në përgjigje të letrës së Ministrit të Kosovës, Enver Hoxhaj të datës 24 Qershor 2014 për Ministrin e Punëve të Jashtme të Singaporit, Vivian Balakrishnan, Republika e Singaporit njeh Kosovën dhe vendos marrëdhënie diplomatike”, citon Zëri.

Ministri Hoxhaj do të vizitojë Singaporin në janar 2017 për të thelluar marrëdhëniet politike, ekonomike dhe tregtare me Singaporin.

Singapori është shtet në Azinë Juglindore dhe ka popullsi prej 5.7 milionë banorësh. Ai është një nga vendet më të zhvilluara në botë. Ndërsa në bazë të kësaj marrëveshje, Singapori ka pranuar pasaportat e Kosovës dhe nga tani kosovarët mund të marrin vizë në misionet diplomatike dhe konsullore të Singaporit apo të aplikojnë online për e-vizë për të hyrë në Singapor që nga sot.