Fluturimet “low cost” Tiranë-Budapest, kërkohet aeroporti i Kukësit

Ministri i Transporteve, Dervishaj tha se rivendosja e një linje ajrore mes dy shteteve, përveç ndikimit pozitiv që do të ketë në sektorin turizmit, zgjeron mundësinë për shkëmbimet tregtare

Që nga prilli i vitit të ardhshëm nga Tirana në drejtim të Budapestit nis linja e fluturimeve “low cost” nga WIZZAIR me çmime relativisht të lira. Për fillimin e flluturimeve nga kjo kompani, sot është nënshkruar një memorandum nga ministri shqiptar i Transporteve, Sokol Dervishaj me autoritetet hungareze.

Gjatë vizitës në Budapest, Dervishaj tha se ardhja e kompanisë “low cost” për fluturimet Budapest-Tiranë dhe anasjelltas, është zhvillim shumë pozitiv për shqiptarët, që mund ta përdorin më tej Budapestin për të shkuar në destinacione të tjera.

Dervishaj tha se rivendosja e një linje ajrore mes dy shteteve, përveç ndikimit pozitiv që do të ketë në sektorin e turizmit, zgjeron mundësinë për shkëmbimet tregtare.

Ministri i Transporteve ka thënë se do donte të shikonte mundësitë që kompania WIZZAIR të operojë direkt, qoftë dhe me koncesion aeroportin e Kukësit, propozim që është mirëpritur nga ministri hungarez i Transporteve. Pra, Aeroporti i Kukësit shihet si pozitë strategjike pas është në kufij me Kosovën.

Fillimi i fluturimeve të kësaj kompanie të njohur “low cost”, do të hapë edhe më shumë tregun shqiptar dhe do të ndikojë drejtëpërdrejtë në uljen e çmimeve të biletave, tha Dervishaj.