I vërtetohet fajësia por i ulet dënimi shqiptarit që ka vrarë shqiptarin

Gjykata e Lartë e Bernës ndonëse e ka konfirmuar gjykimin e bërë nga gjykata e shkallës së parë, megjithatë ia ka ulur dënimin vrasësit 44 vjeçar, nga 10 vjet sa e kishte, në 8 vjet e 9 muaj burg,

Vrasja me thikë e një shqiptari të Kosovës nga një shqiptar i Maqedonisë, që ka ndodhur në vjeshtën e vitit 2013, nuk ka qenë aksidentale por vrasje me paramendim. Gjykata e Kantonit të Bernës e ka vërtetuar si të drejtë dënimin që më parë e kishte shqiptuar gjykata e shkallës së parë mbi këtë rast, shkruan bernerzeitung.ch.

Por, Gjykata e Lartë megjithatë ia ka ulur dënimin vrasësit 44 vjeçar, nga 10 vjet sa e kishte, në 8 vjet e 9 muaj burg, transmeton albinfo.ch. Kjo zbritje ka ardhur si rezultat i faktit se Gjykata e Lartë te dënimi për vrasje me paramendim i ka dhënë peshë më të madhe segmentit të vrasjes me paramendim eventual, ka theksuar kryesuesi i trupit gjykues. Kjo, me fjalë tjera kuptohet kështu: vrasësi nuk e kishte synuar vrasjen në mënyrë konkrete dhe direkte por “e kishte marrë në konsideratë” atë.

Nga ana tjetër, prokuroria kishte kërkuar 12 vjet burg për shqiptarin nga Maqedonia.

Siç ka shkruar albinfo.ch edhe më parë, Viktima, së bashku me dy shokë kishin shkuar  në shtator të vitit 2013 në klubin e natës në Lätti afër Rapperswilit të Bernës. Në barin e lokalit kishte shpërthyer një sherr në mes tij dhe shqiptarit nga Maqedonia. Fillimisht, dy kolegët zviceranë të kosovarit dhe zonjat e pranishme aty, kishin arritur t`i pajtonin. Por pastaj tre shokët u kthyen nga rruga për në shtëpi, ku ishin nisur, që të kërkonin sqarim nga 44 vjeçari, transmeton albinfo.ch. Pastaj në parkingun e lokalit është përshkallëzuar konflikti.

Sipas Gjykatës Regjionale të Biel-it, shqiptari i Maqedonisë së pari ka goditur me thikë njërin nga  dy shokët e pastaj edhe vet shqiptarin e Kosovës. Ky i fundit ka vdekur pak pas dërgimit në spital. I akuzuari ka pranuar se ka pasur thikë me vete. Por, ai nuk e dinte se cili ka goditur me thikë, kishte deklaruar në procesin gjyqësor të zhvilluar para një viti.