Kallëzim penal për kosovaren: “Pengonte njerëzit duke kënduar në vend publik”

Ky rast kishte ndodhur në qershor të këtij viti. Kosovarja me emrin Nekibe kishte vënë kufjet në veshë dhe po këndonte me zë. “Papritur katër policë mu afruan dhe ma bllokuan rrugën. Ata më thanë se po i pengoja njerëzit”

30 vjeçarja me emrin Nekibe, shqiptare nga Kosova kishte kënduar këngën e njohur “I feel good” të James Brown dhe përcjellë këndimin me vallëzim, derisa ishte duke hipur në metronë e Lozanës. Këndimi me zë në ambient publik, sipas policëve të këtij qyteti, përbën shkelje të rendit dhe qetësisë publike, prandaj ata kanë ushtruar kallëzim penal ndaj Nekibes, shkruan 20minutes.ch.

Ky rast kishte ndodhur në qershor të këtij viti. Kosovarja kishte vënë kufjet në veshë dhe po këndonte me zë, transmeton albinfo.ch. “Papritur katër policë mu afruan dhe ma bllokuan rrugën. Ata më thanë se po i pengoja njerëzit”, tregon ajo për gazetën “24Heures”.

Ka pesë vjet që policia e bezdis, ka thënë gruaja, e cila tashmë ka qenë edhe e dënuar për sherre me policinë. Ajo thotë se policia refuzon të tregojë përmbajtjen nga kamera vëzhguese dhe këtë e bën pasi që xhirimet do ta nxirrnin kosovaren të pafajshme. Ndërsa avokati i saj duke e mbrojtur klienten e vet thotë: “motoçiklistët bëjnë zhurmë më shumë se kjo grua që këndon. Prandaj ai i sheh akuzat si të pabaza”.

Nga ana tjetër, një zëdhënës i policisë së Lozanës ka thënë se “kur policët e padisin dikë, atëherë këtë e bëjnë për një person që ka shkelur ligjin”.

Por, është një dëshmitar i cili do të mund ta nxirrte të pafajshme kosovaren, shkruan më tutje gazeta frankofone. Ai ka thënë për 20minutes.ch se kënga dhe vallëzimi i saj nuk ka penguar fare askënd. Por, duke qenë se ai është me qëndrim ilegal në Zvicër, nuk dëshiron të japë deklaratë zyrtare, nga frika se mund ta kthejnë në vendin e tij ku tash mbretëron lufta.

Sido ë të jetë, veprimi i ruajtësve të rendit nga Lozana nuk pranohet nga të gjithë. Kështu, gazetat e përmendura më lart citojnë policë nga kantonet tjera frankofone, të cilët vetëm e tundin kokën kur dëgjojnë për këtë. “Ne nuk kemi pasur asnjëherë ndonjë rast të krahasueshëm. Por kosovarja mundet lirisht të shpërngulet në ndonjë regjion tjetër. Te ne ajo mund të këndojë dhe vallëzojë sa të dojë”, kanë thënë ata.