Përpjeka e ministrit Murati për mësimin shqip në Zvicër

Gjatë vizitës në Zvicër, ministri i Diasporës, Valon Murati, i shoqëruar nga Konsulli i Përgjithshëm i Kosovës në Gjenevë, Ramadan Avdiu, zhvilloi takime zyrtare me udhëheqësit e departamenteve të arsimit për Kantonin e Friburgut, Jean –Pierre Siggen dhe të Gjenevës, Anne Emery-Torracinta.

“Në të dy takimet u bisedua për bashkërendimin e përpjekjeve në mes të dy shteteve për ta rritur numrin e nxënësve në shkollën shqipe, edhe për shkak se, ashtu siç e theksuan edhe udhëheqësit e departamentit të arsimit të të dy kantoneve, të gjitha hulumtimet shkencore dhe pedagogjike e vërtetojnë se fëmijët që e mësojnë mirë gjuhën e nënës, i mësojnë më mirë edhe gjuhët e tjera”, ka thënë ministri Murati, njofton albinfo.ch.

Gjithashtu ai së bashku më delegacionin e tij vizitoi edhe Dhomën e Tregtisë, Industrisë dhe Shërbimeve Zvicër-Kosovë, ku u prit nga presidenti i Dhomës, z.Stefan Sarkany, me bashkëpunëtorë.

Në këtë takim nikoqirët prezantuan një sërë projektesh, të cilat ata mendojnë t’i investojnë në të ardhmen në Kosovë në fushën e aftësimit profesional, hotelerisë, industrisë së përpunimit të qumështit, etj.

Albinfo.ch