Shefi i Migrosit, kundër ligjit për kufizimin e orarit të punës së shitoreve

Sipas Bolligerit, për mbrojtjen e të drejtave të punëtorëve në tregti mjafton ligji federal i punës, i cili e lejon punën e shitoreve brenda kornizës kohore nga ora 6 deri në orën 23

Orari i punës i shitoreve në Zvicër nuk duhet të përcaktohet nga ligji por nga kërkesat e tregut. Kështu ka thënë në një intervistë për gazetën “Schweiz am Sonntag” Herbert Bolliger, shefi i kompanisë më të madhe zvicerane të tregtisë me pakicë, Migros.

“Nuk ka nevojë për një ligj mbi oraret e shitoreve” ka thënë Bolliger veç tjerash. Duhet të jenë konsumatorët ata, që me shprehitë e tyre të blerjes të vendosin mbi këtë çështje, transmeton albinfo.ch. “Ne në fakt nuk hapim askund shitore në rast se atje nuk vijnë konsumatorë”.

Sipas Bolligerit, për mbrojtjen e të drejtave të punëtorëve në tregti mjafton ligji federal i punës, i cili e lejon punën e shitoreve brenda kornizës kohore nga ora 6 deri në orën 23.

Bolliger me këtë deklarim e ka bërë si reagim ndaj një projektligji që i është dorëzuar parlamentit për miratim, përcjell albinfo.ch. Ai parashikon që gjatë ditëve të punës shitoret mund të mbahen hapur nga ora 6 deri në orën 20 ndërsa në ditët e fundjavës nga ora 6 deri në orën 18.