Kreatorja Flaka Jahaj mahnit publikun në “Mode Suisse” të Zvicrës

Kreatorja shqiptare që jeton në Zvicër, Flaka Jahaj ka prezantuar koleksionin e saj më të ri në edicionin e 9-të të “Mode Suisse”, e cila është mbajtur të hënën në Cyrih të Zvicrës.

Kreacionet e kreatores Jahaj të cilat u prezantuan nën markën e saj “Iahai” kanë befasuar jo vetëm publikun në sallë por edhe mediat zvicerane. Gazeta e njohur zvicerane nzz.ch  jep komplimente të mëdha kreatores nga Prishtina dhe fotografitë e kreacioneve të saj i vendos në ballinë të shkrimit.

Bëhet fjalë për koleksionin e  sezonit vjeshtë/dimër 2016-17

“Kreacionet e punuara më dorë nga “Iahai” kanë befasuar, sidomos kombinimi më pëlhura shumë ngjyrëshe apo edhe kreacioni më katrore të kombinuar më ngjyrë portokalli”, shkruan nzz.ch, transmeton “albinfo.ch”.

Krahas Flakës, në këtë edicion janë prezantuar edhe talent të rinj dhe kreatorë të njohur në Zvicër.

Flaka Jahaj  për “albinfo.ch” ka treguar se veshjet i prodhon në Prishtinë, por prezantimin dhe shitjen i bën në Zvicër. Inspirimi i saj është gjithmonë tek folklori dhe tradita shqiptare, por që i shndërron në dizajn modern për klientë e saj.

“Unë me bashkëpunëtoret, atelietë e mia në Cyrih dhe në Prishtinë i kam specializuar për punë artizanale dhe bashkëpunoj në vazhdimësi me organizatat e grave si «Dera e hapur-Open Door» nga Prishtina si dhe me atë «Aba» nga Istogu, për produktet “Made in Kosova”, tha për albinfo.ch Flaka Jahaj.

Edhe këpucët e modeleve janë kreacion i Flaka Jahaj të prodhuara në Fabrikën e këpucëve “SOLID ” nga Suharekë.

Flaka ka përfunduar studimet master për dizajnë të modës në në Londër në Universitetin më të njohur Central Saint Martins, ndërsa puna e saj është shpërblyer më çmime të ndryshme, ku më i rëndësishmi ishte vendi i parë në“Swiss Design Awards 2014”.

Studimet bachelor i ka kryer në shkollën prestigjioze të modës në Paris, studio “Bercot”.

Ndërsa ndërmjet bachelorit dhe masterit ajo për tri vite ka qenë asistente e dizajnerit Rick Owens në Paris

Albinfo.ch