Më 6 dhjetor mbahet Samiti BE-Ballkan Perëndimor

E konfimron Gjermania,

 

Udine Ruge, këshilltar për çështje evropiane të kancelarit gjerman, Olaf Scholz, konfirmon se integrimi i Ballkanit Perëndimor në Bashkimin Evropian është shndërruar në prioritetet kryesor të Gjermanisë, përcjell albinfo.ch.

Referuar deklaratës së kancelarit Scholz më 29 gusht, në samitin e mbajtur në Pragë të Republikës Çeke, këshilltari Ruge rikujton se samiti i së enjtes, në kuadër të Procesit të Berlinit, është pjesë e këtij angazhimi edhe personal të kreut të Qeverisë gjermane.

“Më duhet të theksoj edhe një herë se ky nuk është samit i BE-së, edhe nëse në të marrin pjesë liderët e BE-së”, rikujtoi Ruge, në një konferencë për media të mbajtur në Berlin.

“Ka një proces tjetër që organizohet nga presidenti i Këshillit Evropian, Charles Michel, më 6 dhjetor”, tha Ruge, raporton RTKlive, duke sqaruar se ai samit organizohet nga BE-ja.

Ai deklaroi se nga samiti në Bërdo në Slloveni në tetor 2021,  ka një marrëveshje për mbajtjen një herë në vit të një takimi të nivelit të lartë midis BE-së dhe vendeve të Ballkanit Perëndimor.

“Përgatitjet për këtë samit në dhjetor sapo kanë filluar. Këtë po e përmend vetëm për të thënë se samiti i Procesit të Berlinit është ndërthurje”, u shpreh zyrtari i lartë i shtetit gjerman.

Liderët e Ballkanit Perëndimor do të mblidhen më 3 nëntor në Berlin, në kuadër të Procesit të Berlinit.

Ata do të nënshkruajnë tri marrëveshje, të cilat vlerësohet si i japin dinamikë të re gjendjes aktuale në këtë rajon.

Marrëveshjet që do të nënshkruhen janë për njohjen reciproke të letërnjoftimeve ndërmjet 6 vendeve të Ballkanit Perëndimor, pastaj njohjen reciproke të diplomave universitare si edhe të kualifikimeve profesionale.

 

---