59 vjeçare, bëhet për herë të parë nënë!

Zlata nuk kishte mundësi të mbetej shtatzënë në mënyrë të natyrshme, por falë arritjeve të reja (të kontestueshme) të mjekësisë ajo ia ka dalë të realizojë ëndrrën e saj jetësore për tu bërë nënë

Serbja Zlata Vasilijevic nga lokalitetin Hägensdorf i Kantonit Solothurrn, është bërë si 59 vjeçare për herë të parë nënë. Kjo ka ndodhur para gjashtë muajsh, falë mjekësisë moderne të fekondimit artificial, raporton televizioni Tele M1.

Zlata nuk kishte mundësi të mbetej shtatzënë në mënyrë të natyrshme, por falë arritjeve të reja (të kontestueshme) të mjekësisë ajo ia ka dalë të realizojë ëndrrën e saj jetësore për tu bërë nënë, transmeton albinfo.ch. 59 vjeçja ka shkuar në një vend të Evropës së lindjes (nuk tregohet në cilin) ku mjekët ia kanë mundësuar fekondimin  me spermën e të shoqit.

Me 59 vjetët e saj, Zlata është rreth dyfish më e vjetër se nënat mesatare në Zvicër. Dhe kjo sjell me vete sigurisht komplikime shëndetësore. Një gjinekolog ka thënë për Tele M1 se rreziqet te një rast i lindjes në një moshë të shtyrë mund të jenë të në lidhje me zemrën dhe çrregullimet kardiovaskulare por edhe komplikime gjatë lidnjes.

Por Zlata Vasilijevic e ka kaluar shtatzëninë pa probleme shëndetësore. Ajo e ka sjellë në jetë Angela-n e saj me operacion cezarian, tri javë më herët se parashihej, dhe nuk e fsheh lumturinë që është bërë më në fund nënë.