Kanye West falënderon Edi Ramën dhe Shqipërinë pas koncertit në Tiranë

Keystone EPA/RAMON VAN FLYMEN

Reperi amerikan Kanye West, i njohur gjithashtu si Ye, ka shprehur mirënjohjen e tij për pritjen që iu bë gjatë koncertit të mbajtur mbrëmjen e kaluar në “Eagle Stadium” në Tiranë.

Përmes një postimi në rrjetet sociale, West falënderoi kryeministrin Edi Rama dhe qytetarët shqiptarë për mikpritjen, duke vlerësuar edhe stadiumin e ndërtuar për këtë ngjarje.

“Faleminderit Edi Rama dhe gjithë Shqipërisë për mikpritjen në vendin tuaj të bukur”, shkroi artisti amerikan në mesazhin e tij.

Koncerti i Kanye West tërhoqi mijëra fansa nga vende të ndryshme të botës, me pjesëmarrës nga rreth 80 kombësi. Atmosfera gjatë mbrëmjes u shoqërua me emocione të mëdha dhe entuziazëm nga publiku.

Ky spektakël muzikor u cilësua si një nga aktivitetet më të rëndësishme artistike të zhvilluara në Shqipëri, duke rritur vëmendjen ndërkombëtare ndaj vendit si destinacion për evente të mëdha kulturore.