25-vjeçari shqiptar ndalohet në aeroportin e Memmingenit, pajisjet e punës zbuluan planin për të hyrë ilegalisht në Gjermani

(KEYSTONE/Christian Beutler)

Një 25-vjeçar shqiptar është ndaluar nga autoritetet kufitare në aeroportin e Memmingenit, pasi dyshohet se kishte udhëtuar drejt Gjermanisë me qëllim punësimi, ndonëse kishte deklaruar se po hynte në vend për arsye turistike.

Ngjarja ka ndodhur të enjten, kur i riu mbërriti në aeroport me një fluturim nga Tirana. Gjatë kontrollit kufitar, ai u tha autoriteteve se qëllimi i udhëtimit ishte turistik.

Dyshimet e policisë u shtuan gjatë kontrollit të bagazhit të dorës. Në vend të sendeve që zakonisht lidhen me një udhëtim turistik, oficerët gjetën pajisje pune, duke ngritur dyshime se qëllimi i vërtetë i udhëtimit ishte punësimi në Gjermani.

Për të mbështetur deklaratën e tij, 25-vjeçari paraqiti edhe një biletë kthimi, si dëshmi se kishte planifikuar të largohej nga Gjermania. Megjithatë, gjatë verifikimeve, policia zbuloi se bileta ishte anuluar përpara mbërritjes së tij në Memmingen.

Bazuar në këto të dhëna, autoritetet gjermane arritën në përfundimin se deklarata e tij për qëllime turistike nuk përputhej me rrethanat e udhëtimit.

Si pasojë, shqiptarit iu refuzua hyrja në Gjermani dhe iu vendos ndalim hyrjeje dhe qëndrimi për një periudhë prej dy vitesh në të gjithë Zonën Schengen/albinfo.ch/