Lumir Abdixhiku mbetet në krye të LDK-së pas votimit në Kuvendin e jashtëzakonshëm

Lumir Abdixhiku ka siguruar vazhdimin e mandatit si kryetar i Lidhjes Demokratike të Kosovës, pasi delegatët e partisë nuk e miratuan kërkesën për shkarkimin e tij. Vendimi u mor në Kuvendin e jashtëzakonshëm të LDK-së, ku u diskutua vetëm për të ardhmen e udhëheqjes së tij.

Në këtë mbledhje morën pjesë rreth 330 delegatë, të cilët përmes votimit të fshehtë vendosën që Abdixhiku të vazhdojë ta drejtojë partinë.

Nga votimi i delegatëve, 170 votuan kundër shkarkimit të Abdixhikut, ndërsa 152 ishin pro shkarkimit të tij,

Kuvendi i jashtëzakonshëm u thirr pas rezultatit të zgjedhjeve të 7 qershorit, ku LDK-ja u rendit përsëri në vendin e tretë. Një grup delegatësh e konsideruan këtë rezultat si dështim të udhëheqjes aktuale dhe kërkuan largimin e Abdixhikut nga posti i kryetarit.

Gjatë fjalimit të tij para delegatëve, Abdixhiku e cilësoi iniciativën për shkarkim si të gabuar dhe të parakohshme. Ai akuzoi kundërshtarët brenda partisë për sabotim dhe tha se përgjegjësinë duhet ta mbajnë ata që nuk kanë kontribuar në proceset e brendshme të LDK-së.

“Ky nuk është një moment i lehtë”, u shpreh Abdixhiku, duke theksuar se përballja e sotme nuk lidhet me pozitën personale, por me drejtimin dhe të ardhmen e partisë.

Përkrahësit e ndryshimeve brenda LDK-së, ndërkohë, argumentuan se partia ka nevojë për një reflektim të thellë pas rezultateve të fundit zgjedhore. Disa figura të njohura të partisë, përfshirë Hykmete Bajramin dhe Avdullah Hotin, kanë shprehur pakënaqësi me drejtimin aktual.