10% taksa për mallrat nga Serbia e Bosnja

Qeveria e Kosovës ka marrë vendim që të rrit taksën në importe për mallrat që vijnë nga Serbia dhe Bosnja e Hercegovina për 10 për qind për të gjitha produktet.

Ministri i Tregtisë së Kosovës, Endrit Shala, i cili propozoi këtë masë, tha se është praktikë ndërkombëtare. Kjo u përkrah edhe nga zëvendëskryeministri Enver Hoxhaj, që e cilësoi si kundërpërgjigje ndaj fushatës së egër të Serbisë, përcjell albinfo.ch.

Ky vendim i ekzekutivit është mirëpritur  nga klubi i Prodhuesve të cilët thonë se do të mbrojë interesat e prodhimeve vendore dhe përbën një lehtësim për prodhuesit vendor.

“Klubi i Prodhuesve e përkrah një vendim të tillë kur kihet parasysh pengesat e vazhdueshme që këto dy shtete i kanë bërë produkteve të Kosovës për depërtimin në tregjet e tyre. Po ashtu këto vende kanë subvencionuar në vazhdimësi  produktet që eksportojnë në vendin tonë, duke bërë që produktet e tyre të shiten nën çmimin e prodhimit. Kjo praktikë e aplikuar nga Serbia dhe Bosnja në masë të madhe ka dëmtuar prodhuesit e Kosovës duke i bërë jo-konkurrues”, thuhet në njoftim.