​Kosova ndan 250 mijë euro për të luftuar terrorizmin

Në mbledhjen e sotme që kishte vetëm një pikë të rendit të ditës, Qeveria e Kosovës ka ndarë 250 mijë euro për përkrahjen e koalicionit global kundër ISIS.

Këtë e bëri të ditur kryeministri i Kosovës, Ramush Haradinaj, i cili për kë shumë se gjashtë muaj po e udhëheq Qeverinë në detyrë.

Shuma është marrë nga shpenzimet e paparashikuara.“Kosova është anëtare e Koalicionit Global Kundër Terrorizimit, që i prinë Amerika, në kuadër të këtij obligimi kryem detyra që janë të përkrahjes në shumë drejtime. Kosova është e gatshme të përkrahë këtë koalicion në aspektin ushtarak, të inteligjencës, të qëndrimeve publike. Vitin që shkoi ka qenë shumë prej 100 mijë eurosh.

Kësaj radhe Kosova ka vendosur të ndajë 250 mijë euro, tha Haradinaj në konferencë për media. “Ne kemi qenë të përfshirë si Kosovë me implikimet e ISIS-it, për shkak se shtetas të Kosovës kanë qenë të involvuar, falënderojmë të gjithë qe na kanë ndihmuar t’i kthejmë në Kosovë nënat dhe fëmijët.

Pasojat e luftës kundër terrorizmit nuk janë përmbyllur, e kemi obligim si vend, nisur nga vetë situata jonë që kemi qenë të prekur, e ndiejmë nevojën e përmbushjes së këtij obligimi”, shtoi ai.

Gjithashtu, Ramush Haradinaj ka thënë se në janar dhe shkurt nuk ka pengesa të funksionimit buxhetor, por rreziku fillon nga gjysma e dytë e shkurtit që, siç tha ai, “nëse hyjmë në zonën e kuqe të gjysmës së dytë të shkurtit pa buxhet, atëherë fillon rreziku”.