Zvicra mbështet sanksionet e BE-së kundër Rusisë

(KEYSTONE/Gaetan Bally)

Qeveria zvicerane ka dënuar pushtimin e Ukrainës nga Rusia dhe mesazhet e mbështetjes ishin konkrete për Ukrainën, transmeton albinfo.ch.

Presidenti zviceran, Ignazio Cassis, tha sot se Zvicra do t’u përmbahet të gjitha sanksioneve të BE-së ndaj Rusisë, duke përfshirë ngrirjen e aseteve ruse dhe ato që synojnë Presidentin Vladimir Putin, kryeministrin Mikhail Mishustin dhe ministrin e Jashtëm, Sergej Lavrov.

Cassis tha se “të luash në duart e një agresori, nuk është neutrale”, transmeton tutje albinfo.ch.

“Shtetet që mbrojnë të drejtat e njeriut duhet të jenë në gjendje të mbështeten te Zvicra”, tha Cassis.

Individët dhe subjektet ruse në listën e zezë të Bashkimit Evropian nuk do të jenë në gjendje të përdorin bankat zvicerane për të anashkaluar sanksionet evropiane kundër Rusisë, tha dje Autoriteti i Mbikëqyrjes Financiare të Zvicrës (Finma).

Ndërmjetësuesve financiarë në Zvicër iu ndalua të hyjnë në marrëdhënie të reja biznesi me individët dhe kompanitë në listën e sanksioneve dhe duhet të raportojnë menjëherë marrëdhëniet ekzistuese të biznesit, thuhet në një deklaratë të Finma.

Sot, qeveria zvicerane shtoi në listën e saj vëzhguese 363 individë të rinj rusë dhe katër kompani që BE-ja i kishte vendosur në listën e sanksioneve.

Zvicra gjithashtu është zotuar të pranojë refugjatë ukrainas.

Ndërsa vendi nuk ndodhet në afërsi të menjëhershme gjeografike me Ukrainën, “ne nuk do t’i lëmë ukrainasit poshtë”, tha të premten ministrja e Drejtësisë, Karin Keller-Sutter.

Sekretariati Shtetëror për Migracionin (SEM) tha se vendi mund të pranojë deri në 2,000 refugjatë ukrainas, “në varësi të evolucionit të konfliktit”.  /Albinfo.ch