Zvicra mund të shpallë amnesti tatimore

Amnestia tatimore nënkupton që personat që kanë bërë evazion fiskal (u kanë bishtnuar tatimeve) tashti, në kushte të zbutura mund t`i deklarojnë pasuritë që deri tash i kanë mbajtur të padeklaruara

Ministrja zvicerane e financave, Eveline Widmer-Schlumpf ka hapur debatin mbi nevojën e një amnestie të përgjithshme. Në një intervistë për gazetën “NZZ am Sonntag”, ministrja ka thënë se qartësimi i prejardhjes së “parave të zeza” vjen si detyrim nga këmbimi automatik i informacioneve (AIA). Nëse rregullat do të ndryshohen nevojitet një fazë kalimtare korrekte, ka theksuar ministrja.

Në kuadrin e AIA sa i përket botës së jashtme, Zvicra ka arritur një marrëveshje “rregullarizimi” me të gjitha shtetet partnere, shkruan srf.ch. Dhe, në përputhje me këtë situatë, ngjashëm duhet zgjidhur çështjen edhe në nivel vendi, ka sqaruar Widmer-Schlumpf.

Me futjen në fuqi të AIA, autoritetet tatimore të Zvicrës mund të marrin informacione mbi kontot deri tash të padeklaruara që zviceranët kanë hapur jashtë vendit, transmeton albinfo.ch. Kjo situatë e re e tematizon tash amnestinë tatimore. Ajo nënkupton që personat që kanë bërë evazion fiskal (u kanë bishtnuar tatimeve) tashti, në kushte të zbutura mund t`i deklarojnë pasuritë që deri tash i kanë mbajtur të padeklaruara.

Zvicra, nga viti 2010 mundëson deklarimin një herë në jetë të parave të zeza. Në një rast të tillë që quhet edhe “amnesti e vogël tatimore”, deklaruesit lirohen nga dënimi, por kamatat detyrohen t`i paguajnë.