Zvicra do të ekstradojë në SHBA kinezin e dyshuar për spiunazh

Shkencëtari në fjalë është arrestuar nga fundi i majit në Kantonin Baselland dhe që atëherë po mbahet në burg

Zvicra do të ekstradojë në SHBA një shkencëtar kinez, të dyshuar për spiunazh ekonomik. Zyra Federale e Drejtësisë ka konfirmuar se tashmë është marrë vendimi i shkallës së parë për një veprim të tillë. Por, kundër një vendimi të tillë ende mund të ushtrohet ankesë në Gjykatën Federale Penale, shkruan srf.ch.

Shkencëtari në fjalë është arrestuar nga fundi i majit në Kantonin Baselland dhe që atëherë po mbahet në burg, transmeton albinfo.ch. SHBA akuzon atë se i ka dorëzuar në Kinë sekretet afariste të koncernit britanik GlaxoSmithKline.

Këto të dhëna i ka vjedhur motra e tij, një biokimiste e shquar. Ajo, vitin e kaluar është shpallur fajtore për spiunazh ekonomik nga një gjykatë e SHBA-së dhe ka pranuar fajësinë.

---