Zvicra dhe Shqipëria nënshkruajnë Marrëveshjen për taksat e dyfishta

Zvicra dhe Shqipëria kanë nënshkruar sot në Tiranë një protokoll mbi ndryshimin e marrëveshjes për taksat e dyfishta në fushën e tatimit të të ardhurave dhe të pasurisë.

Krahas rregullave të reja mbi këmbimin e informacioneve në fushë të tatimeve, marrëveshja mund të përshtatet edhe në pika të tjera të politikës që udhëheq Zvicra në lëmin e marrëveshjeve për tatime, thuhet në një njoftim të Zyrës Federale të Zvicrës për taksa. Në veçanti pajtimi për klauzolën e ndarjes bën të mundur evitimin e taksimit të dyfishtë.

Sa i përket taksave për licenca, klauzola përkatëse parasheh që secila marrëveshje me përparësi në këtë fushë që në të ardhmen Shqipëria do ta lidhë me ndonjë vend të BE-së ose të EWR-së do të vlejë edhe për Zvicrën, gtransmeton albinfo.ch. Ndërsa një klauzolë tjetër parandalon që nga përparësitë e marrëveshjeve të përfitojnë persona që nuk e kanë këtë të drejtë.

Pas përmbylljes së negociatave, më 19 prill 2015 ishte bërë parafimi i protokollit të ndryshimit, i cili pastaj u ishte dërguar për miratim kantoneve dhe shoqatave ekonomike. Pasi që të gjitha e kishin miratuar, u mbetet kuvendeve të dy shteteve që ta miratojnë këtë marrëveshje.