Zjarre në malet përreth Prishtinës, Komuna apelon për kujdes

Ekipet e zjarrfikësve dhe Drejtorisë për Siguri dhe Emergjenca po punojnë në terren, ndërsa qytetarëve u kërkohet të shmangin çdo veprim që mund të shkaktojë zjarr

Malet përreth Prishtinës janë përfshirë nga zjarret, ndërsa ekipet emergjente po vazhdojnë punën në terren për menaxhimin e situatës.

Sipas një njoftimi të Komunës së Prishtinës, të transmetuar nga mediat vendore, ekipet e zjarrfikësve dhe Drejtorisë për Siguri dhe Emergjenca janë duke punuar pa ndërprerje në zonat e prekura, përcjell albinfo.ch.

Komuna u ka bërë thirrje qytetarëve që të tregojnë kujdes të shtuar, duke kërkuar që të mos ndizen zjarre në natyrë, të mos digjen barishte apo mbeturina dhe të mos hidhen cigare të ndezura.

Në rast se vërejnë tym ose zjarr, qytetarëve u kërkohet të largohen nga zona e rrezikut dhe të njoftojnë menjëherë zjarrfikësit në numrin 193.

“Një pakujdesi e vogël mund të shkaktojë pasoja të mëdha”, thuhet në apelin e Komunës, e cila kërkon bashkëpunimin e qytetarëve për mbrojtjen e njerëzve, pronës dhe natyrës.

 

 

---