Zjarr në autobusin me fëmijë, asnjë i lënduar

Ky aksident ka sjellë në kujtesë tragjedinë që një grup fëmijësh po ashtu nga Belgjika kishin pësuar më 13 mars të vitit të kaluar në Siders të kantonin Valis

Në një autobus me fëmijë nga Belgjika që po ktheheshin nga një kamping sportiv në Itali ka shpërthyer zjarri derisa po qarkullonte në kantonin Uri.

Ky aksident ka ndodhur në afërsi të hyrjes në tunelin Gothard. dhe ka sjellë edhe njëherë në kujtesë tragjedinë që një grup fëmijësh po ashtu nga Belgjika kishin pësuar më 13 mars të vitit të kaluar në Siders të kantonin Valis.

Por kësaj here, për fat shoferi ka reaguar me kohë dhe të gjithë pasagjerët, përfshirë edhe 38 fëmijë, kanë arritur të dalin me kohë nga autobusi që po digjej. Po ashtu edhe njësiti zjarrfikës ka reaguar me kohë dhe ka shuar zjarrin.

Asnjëri nga gjithsej 45 udhëtarët nuk ka pësuar lëndim.

Në aksidentin e ndodhur më 13 mars të vitit 2012 në Siders të Valisit patën humbur jetën 28 veta, shumica e të cilëve fëmijë.