Zjarr i madh në Kroaci, 36 të lënduar – shtatë në gjendje kritike

Katërmbëdhjetë persona janë shtruar në spital, ndërsa qindra banorë janë detyruar të largohen nga shtëpitë e tyre pas përhapjes së flakëve në zonën e Omišit.

Të paktën 36 persona kanë mbetur të lënduar si pasojë e një zjarri të madh që përfshiu qytetin e Omišit në Kroaci të enjten mbrëma, transmeton albinfo.ch.

Sipas mediave kroate, 14 nga të lënduarit janë dërguar për trajtim në spital, ndërsa pjesa tjetër është liruar pasi ka marrë ndihmën e nevojshme mjekësore.

Autoritetet kanë bërë të ditur se disa persona kanë pësuar djegie të rënda, ndërsa disa të tjerë kanë pasur vështirësi në frymëmarrje si pasojë e tymit të dendur.

Flakët janë përhapur me shpejtësi gjatë natës në disa zona, të favorizuara nga erërat e forta, duke vështirësuar përpjekjet e zjarrfikësve për ta vënë situatën nën kontroll.

Për shkak të rrezikut të madh, qindra banorë janë evakuuar nga zonat e prekura, ndërsa ekipet e emergjencës kanë vazhduar ndërhyrjet për të parandaluar përhapjen e mëtejshme të zjarrit.

Mediat kroate raportojnë se autoritetet po monitorojnë nga afër situatën, ndërsa dëmet materiale ende nuk janë vlerësuar plotësisht./Albinfo.ch

https://www.facebook.com/watch/?v=1333790005617671

 

 

---