Xhelal Sveçla dënohet me një vit burgim me kusht për gazin lotsjellës në Kuvend

Kosovë - Ministri në detyrë i Punëve të Brendshme u shpall fajtor për përdorimin e mjetit të rrezikshëm gjatë protestës politike kundër demarkacionit me Malin e Zi

Ministri në detyrë i Punëve të Brendshme të Kosovës, Xhelal Sveçla, është dënuar me një vit burgim me kusht për hedhjen e gazit lotsjellës në Kuvendin e Kosovës në vitin 2018, transmeton albinfo.ch.

Vendimi është marrë nga Gjykata Themelore në Prishtinë, e cila e ka shpallur Sveçlën fajtor për veprën penale “përdorim i armës apo mjetit të rrezikshëm”.

Dënimi është me kusht, që do të thotë se Sveçla nuk do ta vuajë dënimin me burg, nëse gjatë periudhës së përcaktuar nga gjykata nuk kryen një tjetër vepër penale.

Sveçla nuk ishte i pranishëm në sallën e gjyqit në momentin e shqiptimit të dënimit. Gjatë procesit gjyqësor, ai ishte deklaruar i pafajshëm dhe kishte argumentuar se hedhja e gazit lotsjellës ishte pjesë e një aktiviteti politik, përmes të cilit, si deputet opozitar në atë kohë, kundërshtonte ratifikimin e marrëveshjes për demarkacionin e kufirit me Malin e Zi.

Në të njëjtin rast janë të akuzuar edhe ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ish-deputeti i Vetëvendosjes Salih Zyba dhe ish-deputetja e Lidhjes Demokratike të Kosovës Drita Millaku. /Albinfo.ch

---