Wieland: Politikanët të mos japin afate për vizat

Pas takimit që ka pasur me grupin parlamentar të LDK-së, ai ka thënë se në Parlamentin Evropian nuk ka shkuar ndonjë dokument për t’u votuar për liberalizimin e vizave për Kosovë

Zëvendëspresidenti i Parlamentit Evropian, Rainer Wieland, ka kërkuar nga drejtuesit e institucioneve dhe partive politike në Kosovë që të mos japin afate kohore për liberalizimin e vizave.

Pas takimit që ka pasur me grupin parlamentar të LDK-së, ai ka thënë se në Parlamentin Evropian nuk ka shkuar ndonjë dokument për t’u votuar për liberalizimin e vizave për Kosovë.

Ndërsa, Shefi i GP të LDK-së, Avdullah Hoti, tha se mbajtja e ministrave me aktakuza në Qeveri nga kryeministri Haradinaj është një sinjal i gabuar, që po i dërgohet BE-së për luftimin e krimit të organizuar dhe korrupsionit.

Për deklaratën e kancelares Angel Merkel, që bëri në takimin me  presidentin Hashim Thaçin, për luftimin e korrupsionit, Hoti tha se po thellohet mungesa e gatishmërisë së Qeverisë në luftimin e krimit të organizuar dhe korrupsionit.“Derisa nuk ka evidencë të mjaftueshme, kredibile, është e vështirë të marrim rezultate pozitive”, ka thënë Hoti.

Wieland është pritur edhe nga kryeministri Haradinaj i cili ka kërkuar mbështetjen nga Parlamenti Evropian. Haradinaj ka thënë se presin sa më shpejt që qytetarët të marrin lajmin e drejtë dhe të merituar për liberalizimin e vizave.