Vuçiq paralajmëron dorëheqjen: Largohet brenda disa muajsh pas protestave në Serbi

EPA/ANDREJ CUKIC

Presidenti i Serbisë, Aleksandar Vuçiq, ka bërë të ditur se planifikon të japë dorëheqjen nga posti i tij brenda tre deri në katër muajve të ardhshëm.

Në një intervistë për televizionin “Prva”, Vuçiq tha se synon largimin nga presidenca, por ende nuk është vendosur nëse Serbia do të shkojë në zgjedhje të parakohshme presidenciale apo në zgjedhje të njëkohshme presidenciale dhe parlamentare. Sipas tij, vendimi për këtë do të merret nga institucionet kompetente shtetërore.

Deklarata e tij vjen në një periudhë tensionesh politike në vend, pas muajsh protestash të udhëhequra nga studentët. Protestat u nxitën nga tragjedia në stacionin hekurudhor të Novi Sadit, ku humbën jetën 16 persona pas shembjes së një strukture. Lëvizja studentore ka kërkuar zgjedhje të parakohshme parlamentare dhe ka paralajmëruar pjesëmarrje me listë të pavarur zgjedhore.