Vlerat ushqyese që ofron një gotë lëng karote

Ekspertët shëndetësorë thonë se në regjimin tuaj ushqimor nuk duhet të mungojë një perime, siç është karota. Vlerat e saj ushqyese e vitaminat e bëjnë një ushqim shumë të shëndetshëm për sytë, lëkurën, dhëmbët e aparatin tretës. Nëse ndodh rrallë që karrotën ta hani, sigurohuni që vlerat e saj ushqyese t’i merrni përmes lëngut të karotës.

E pasur me vitaminë A

Vetëm një gotë lëng karote në ditë mund të sigurojë 100% kërkesën e trupit për vitamin A.

Kjo vitamin është e mirë për sytë, e përveç kësaj, vitamina A është e nevojshme për zhvillimin e indeve, veçanërisht ato në kockat tuaja.

Vitamina C

Lëngu i karotës është gjithashtu i pasur me vitaminë C. Pirja e një gote lëngu karote mund të plotësojë 35% të nevojave tuaja për këtë vitaminë.

Vitamina C ndihmon në prodhimin e kolagjenit në lëkurë, forcon dhëmbët dhe eshtrat dhe, duke qenë se është një antioksidant shumë i fuqishëm, ndihmon në eliminimin e toksinave.

Kalium

Lëngu i karotës përmban kalium, i cili është një mineral i rëndësishëm që ruan balancin e elektroliteve dhe lëngjeve të trupit.

Një gotë lëng karote na siguron 10% të sasisë së përditshme të kaliumit. Mungesa e kaliumit në trup rrit rrezikun e sëmundjeve të veshkave.