Vjosa Osmani: Nuk kam kërkuar asnjë pozitë politike

Ish-presidentja shmang përgjigjen për kandidimin në zgjedhjet e 7 qershorit, thotë se vendimet do të bëhen publike në kohën e duhur

Ish-presidentja e Kosovës, Vjosa Osmani, ka deklaruar se nuk ka kërkuar të përfshihet në listën e Lidhjes Demokratike të Kosovës (LDK) me ndonjë pozicion të caktuar në top dhjetëshen e saj, duke shmangur dhënien e një përgjigjeje të qartë për kandidimin e saj në zgjedhjet e jashtëzakonshme të 7 qershorit, përcjell albinfo.ch.

E pyetur nëse do të kandidojë për presidente apo për deputete, Osmani tha se çdo vendim do të bëhet publik në kohën e duhur.

“Nuk është mirë me spekulu. Unë nuk kam kërkuar kurrë asnjë pozitë nga askush”, ka thënë ajo, duke shtuar se kur të ketë diçka për të njoftuar, do ta bëjë të ditur.

Osmani theksoi se do të vazhdojë angazhimin e saj me qytetarët, duke përmendur edhe aktivitetet e përbashkëta në terren.

“Me Farije Hotin bashkë te qytetarët”, ka deklaruar ajo.

E pyetur për kritikat e disa ish-deputetëve të LDK-së ndaj rikthimit të saj në politikë, Osmani tha se fokusi i saj mbetet te qytetarët dhe mbështetja që merr prej tyre.

“Do të jem para qytetarëve, deri sot në të gjithë angazhimin tim politik janë ata që ma kanë dhënë forcën dhe edhe tash e tutje do të jetë njësoj”, ka shtuar ajo./Albinfo.ch

---