Autotech

Vetura e parë elektrike sportive zvicerane

Vetura do të prezantohet edhe në Panairin e Veturave në Gjenevë

E hënë, 4 Mars 2019 - 9:30 albinfo.ch

Fotot e para të prototipit elektrik Piëch Mark Zero janë zbuluar. Vetura do të prezantohet edhe në Panairin e Veturave në Gjenevë, përcjell albinfo.ch.

Anton Piëch “ka benzinë” në gjakun e tij: ai është djali i Ferdinand Piëch, ish-kryetar i bordit në Volkswagen, dhe stërnipi i Ferdinand Porsche, themelues i Porsche-s. Por ai po largohet nga lëndët djegëse fosile dhe po përqendrohet, në pjesën më të madhe, në mobilitetin e qëndrueshëm, shkruan “Swissinfo.ch”.

Kompania ka prezantuar modelin e saj të parë, një veturë sportive elektrike, para Panairit Ndërkombëtar të Gjenevës, që do të mbahet nga 7 deri më 17 mars.

Thuhet se vetura peshon më pak se 1,800 kg dhe mund të udhëtojë 500 kilometra në një bateri të ngarkuar.

Gjithsesi janë zbuluar vetëm imazhe dhe adhuruesit e shpejtësisë do ta kenë mundësinë ta shohin nga afër në Gjenevë, përcjell albinfo.ch.