Vetëm 9 shqiptarë mes 310 të pranuarve në Shkollën e Mesme të Policisë, ASH kërkon sqarime

Lista zyrtare e MPB-së përmban 310 nxënës, ndërsa Aleanca për Shqiptarët thotë se vetëm nëntë prej tyre janë shqiptarë

Ministria e Punëve të Brendshme e Maqedonisë së Veriut ka publikuar listën përfundimtare me 310 nxënës të pranuar në Shkollën e Mesme të Policisë “7 Maji”, e cila rikthehet në funksion pas një periudhe të gjatë.

Aleanca për Shqiptarët ka reaguar ndaj përbërjes së gjeneratës së re, duke deklaruar se nga 310 të pranuarit vetëm nëntë janë shqiptarë, ose më pak se 3 për qind, përcjell albinfo.ch.

Lista e publikuar nga MPB-ja përmban emrat e kandidatëve të pranuar, por nuk e përcakton përkatësinë e tyre etnike. Për këtë arsye, shifra për përfaqësimin e shqiptarëve bazohet në vlerësimin e bërë nga subjektet politike dhe mediat që kanë analizuar listën.

Aleanca për Shqiptarët ka kërkuar transparencë të plotë për konkursin, përfshirë numrin e kandidatëve shqiptarë që kanë aplikuar, mënyrën e vlerësimit dhe arsyet që kanë çuar në një përfaqësim kaq të ulët.

Shkolla e Mesme e Policisë “7 Maji” zhvillon program dyvjeçar, ndërsa pas përfundimit të shkollimit, të diplomuarit pritet të punësohen në Ministrinë e Punëve të Brendshme pa shpallje publike.

Nxënësit e pranuar duhet të paraqiten më 1 shtator në Akademinë e Policisë në Idrizovë, së bashku me prindin, kujdestarin ose përfaqësuesin ligjor, për nënshkrimin e marrëveshjes së shkollimit.

---