Një ngjarje tronditëse ndodhi të mërkurën në mbrëmje në Universitetin e Varshavës, ku një burrë 22-vjeçar sulmoi disa persona me një sëpatë, duke shkaktuar vdekjen e një punonjëseje administrative dhe plagosjen e rëndë të një roje sigurie.

Sulmi ndodhi rreth orës 18:40 në ambientet e universitetit, ku 22 vjeçari polak goditi disa persona me sëpatë. Një punonjëse administrative humbi jetën, ndërsa një roje sigurie u plagos rëndë dhe ndodhet në gjendje kritike në spital. Autori u arrestua nga policia menjëherë pas ngjarjes.

Sipas policisë polake, sulmuesi hyri në territorin e universitetit dhe kreu sulmin me sëpatë. Policia konfirmoi arrestimin e tij në vendngjarje. Sipas raportimeve të televizionit privat Polsat News, në vendngjarje është gjetur një sëpatë dhe, të paktën sipas thashethemeve, një kokë e prerë, megjithatë zëdhënësi i prokurorisë nuk e ka konfirmuar zyrtarisht këtë detaj. Ai vetëm bëri me dije se viktima ishte një punonjëse administrative, ndërsa sulmuesi kishte hyrë edhe në një sallë leksionesh të universitetit.