Vapa ekstreme në Zvicër dyshohet se shkaktoi gati 500 viktima brenda tre javësh

Të dhënat zyrtare tregojnë një rritje të ndjeshme të vdekshmërisë, ndërsa ekspertët thonë se temperaturat e larta kanë goditur veçanërisht personat mbi 65 vjeç dhe ata me sëmundje kronike.

Temperaturat ekstreme që përfshinë Zvicrën në fund të qershorit dhe fillim të korrikut dyshohet se kanë shkaktuar rreth 500 vdekje shtesë brenda vetëm tre javësh, transmeton albinfo.ch.

Sipas të dhënave të Zyrës Federale të Statistikave, gjatë kësaj periudhe janë regjistruar 474 vdekje më shumë sesa pritej, duke e bërë këtë valë të nxehti edhe më vdekjeprurëse se vera e vitit 2015, e cila deri tani konsiderohej ndër më të rëndat.

Epidemiologia Martina Ragettli nga Instituti Zviceran i Shëndetit Publik dhe Mjekësisë Tropikale (Swiss TPH) tha se përputhja kohore me valën e të nxehtit tregon se temperaturat e larta janë shkaku më i mundshëm i kësaj rritjeje të vdekshmërisë.

Sipas saj, rreziku për probleme serioze shëndetësore fillon të rritet kur temperaturat arrijnë rreth 25 gradë Celsius, ndërsa mbi 30 gradë ai bëhet dukshëm më i lartë.

Më të rrezikuarit janë personat mbi 65 vjeç, si dhe ata që vuajnë nga sëmundje kronike të zemrës, frymëmarrjes, veshkave, diabeti apo demenca, shkruaj 20minuten. 

Ekspertët theksojnë se temperaturat e larta rëndojnë organizmin, ndërsa tek të moshuarit etja ndihet më pak, çka mund të çojë në dehidrim dhe përkeqësim të sëmundjeve ekzistuese.

Megjithëse numri i saktë i viktimave që lidhen drejtpërdrejt me vapën ende nuk mund të përcaktohet, autoritetet shëndetësore e konsiderojnë valën e fundit të të nxehtit si shkakun më të mundshëm të rritjes së vdekjeve, transmeton tutje albinfo.ch.

---