Kantoni zviceran i Neuchâtel-it do të nisë nga 1 nëntori përdorimin e pesë byzylykëve elektronikë për monitorimin e personave që paraqesin rrezik për përsëritjen e dhunës në familje. Pak ditë para hyrjes në fuqi të kësaj mase, policia ka zhvilluar ushtrime praktike për të testuar reagimin ndaj rasteve të shkeljes së zonave të ndaluara.
Policia e Neuchâtel-it në Zvicër ka zhvilluar një simulim të plotë operacional për të testuar mënyrën e reagimit ndaj alarmit të shkaktuar nga shkelja e zonës së ndaluar nga një person i pajisur me byzylyk elektronik.
Gjatë ushtrimit, në automjetin e policisë në La Chaux-de-Fonds mbërrin një njoftim përmes radios: një person ka shkelur zonën e përcaktuar të përjashtimit.
“E kuptuam. Alarm nga byzylyku elektronik, jemi nisur”, përgjigjet njëri nga zyrtarët policorë, ndërsa kolegu i tij vë në lëvizje automjetin.
Ky ishte simulimi i vetëm i plotë operacional, i zhvilluar vetëm pak ditë para se masa e re të fillojë zbatimin.
Pesë byzylykë elektronikë nga 1 nëntori
Nga 1 nëntori, kantoni i Neuchâtel-it do të vërë në përdorim pesë byzylykë elektronikë për personat që kanë ushtruar dhunë në familje dhe që konsiderohen me rrezik për përsëritjen e veprave të tilla.
Pajisjet mundësojnë përcjelljen e vendndodhjes dhe lëvizjeve të personave që i mbajnë, si dhe identifikimin në kohë reale të rasteve kur ata hyjnë në zona të ndaluara.
Nëse një person i tillë i afrohet banesës së viktimës, aktivizohet alarmi dhe policia dërgon menjëherë një patrullë në vendngjarje.
Alarmet përpunohen nga kompania Certas dhe më pas përcillen në qendrën policore.
Siguria e viktimës, përparësi absolute
Gjatë simulimit, dy zyrtarët policorë ndjekin me përpikëri procedurat e përcaktuara, duke i dhënë përparësi absolute sigurisë së viktimës.
Fillimisht, ata shkojnë në banesën e saj për t’u siguruar se është e mbrojtur. Vetëm pas kësaj nisen për të lokalizuar dhe arrestuar personin që mban byzylykun elektronik.
Skenari i ushtrimit paraqet një rast të besueshëm: një burrë arrestohet për ushtrim të dhunës në familje ndaj ish-bashkëshortes së tij. Gjatë ndalimit, prokurori urdhëron mbikëqyrjen aktive të tij, përfshirë vendosjen e byzylykut elektronik.
Personit i ndalohet të afrohet në një rreze prej gjashtë kilometrash nga banesa e ish-bashkëshortes.
Në rast se ai hyn në zonën e ndaluar, alarmi përpunohet nga kompania përgjegjëse dhe njoftimi përcillet në qendrën policore.
Fillimisht, personi kontaktohet përmes telefonit. Nëse nuk përgjigjet dhe nuk largohet nga zona e ndaluar sa më shpejt të jetë e mundur, policia angazhon një patrullë për ndërhyrje.
Pasi sigurojnë viktimën, zyrtarët policorë nisen për të gjetur personin e dyshuar, duke ndjekur udhëzimet e qendrës së komandimit.
Gjatë ushtrimit, ata identifikojnë një automjet gri që po afrohet nga drejtimi i kundërt. Brenda pak sekondash, policët i dalin përpara automjetit, ia bllokojnë rrugën dhe e ndalojnë drejtuesin, të cilin më pas e prangosin.
Në përfundim, drejtuesi i ushtrimit njofton se simulimi ka përfunduar me sukses.
Policia: Byzylykët elektronikë janë një përparësi e rëndësishme
Pas Gjenevës, Neuchâtel-i bëhet kantoni i dytë në pjesën frëngjishtfolëse të Zvicrës që zbaton këtë masë. Ndërkohë, kantoni i Vaud-it planifikon ta vërë atë në zbatim nga 1 dhjetori.
Nisma është pjesë e një pakete masash të miratuara në nivel kantonal për të luftuar dhunën në familje.
Shefi i Policisë së Neuchâtel-it, Simon Baechler, e konsideron përdorimin e byzylykëve elektronikë një përparësi të rëndësishme për autoritetet.
Sipas tij, kjo teknologji është veçanërisht e dobishme në rastet kur policia nuk ka informacion të mjaftueshëm për lëvizjet e një personi kërcënues, i cili po i afrohet gjithnjë e më shumë personit që duhet të mbrohet.
“ në këto situata, kjo na mundëson mbikëqyrje aktive, të saktë, të lokalizuar dhe në kohë reale, duke na dhënë kështu një përparësi të vlefshme”, thekson Baechler.
Përdorimi i byzylykëve elektronikë synon të përmirësojë aftësinë e policisë për të ndërhyrë me shpejtësi dhe për të parandaluar afrimin e personave potencialisht të rrezikshëm ndaj viktimave të dhunës në familje.
