Uta Ibrahimi, përsëri në Himalaje

Alpinistja Uta Ibrahimi, gruaja e parë shqiptare që ngjiti majën e Everestit vitin e kaluar, sot udhëton për Himalaje, në tentim për të ngjitur maja të tjera, në kuadër të projektit të saj madhor për ngjitjen e 14 majave më të larta në botë – 2 prej të cilave i ka ngjitur.

Maja Lhoste 8,516 metra, maja e 4-t më e lartë në botë, do të jetë projekti i radhës i Uta Ibrahimit. Por, pas përgatitjeve intensive për muaj të tërë, Uta beson se në po këtë ekspeditë do të tentojë të ngjisë suksesshëm edhe një maje tjetër, në mesin e majave 8000 m, për  të cilën do të kemi më shumë informacione ditëve në vazhdim, përcjell albinfo.ch.

“Jam mirë fizikisht dhe psikikisht. Gjithë këto muaj ushtrim intensive, më japin besim që këtë herë do të provoj edhe një maje tjetër. Më duhet të shfrytëzoj çdo ditë deri në maksimum, që të ngjitem në sa më shumë maje, brenda afatit. Kjo për arsye se shpenzimet për këto ekspedita janë enorme dhe rastet si kjo janë të rralla”, shprehet Uta Ibrahimi. Kjo ekspeditë e Uta Ibrahimit u bë e mundur kryesisht falë përkrahjes financiare të donatorëve individualë, sponsorëve të ngushtë dhe njerëzve dashamirës e adhuruesve të alpinizmit. Ndërkohë, institucionet edhe këtë herë kanë heshtur përballë kërkesave e projekteve të alpinistes.