Urimi i LAPSH “Naim Frashëri” për 7 Marsin – Ditën e Mësuesit

Vaxhid Sejdiu, bashkëkryetar i LAPSH “Naim Frashëri” – Zvicër uron për 7 Marsin, Ditën e Mësuesit

Ka momente që të mbushin zemrën me shpresë. Një prej tyre është kur sheh klasën plot me nxënës shqiptarë në Zvicër. Në ato çaste ndjen sikur ringjallet diçka e thellë brenda shpirtit të komunitetit tonë. Aty ku dëgjohet shqipja, aty ku mësohen shkronjat e gjuhës së nënës, aty rilind dashuria për gjuhën, kulturën dhe identitetin tonë kombëtar.

Thënia e njohur e kohëve të vështira të historisë sonë – “Një gjuhë, një flamur, një komb” – vazhdon të jetojë edhe sot, në zemrat e brezit të ri. Prindër të përkushtuar i sjellin fëmijët e tyre në shkollat shqipe që ata të mësojnë gjuhën e të parëve, gjuhën e nënave dhe baballarëve të tyre.

Gjuha nuk është vetëm një mjet komunikimi. Ajo është kujtesë, identitet dhe shpirt. Është ura që lidh të kaluarën me të ardhmen, rrënjët me brezat që rriten larg atdheut.

Për një mësues të gjuhës amtare, çdo fëmijë në klasë është një dritë shprese. Çdo fjalë e shqiptuar në shqip është një hap drejt ruajtjes së identitetit tonë. Çdo pasdite që këta fëmijë e kalojnë në bankat e shkollës shqipe është një sakrificë e bukur për të mbajtur gjallë gjuhën dhe kulturën tonë.

Të lindur larg atdheut, ata po rriten me vetëdijen se kush janë dhe nga vijnë. Dhe kjo është fitorja më e madhe për gjuhën shqipe.

Në këtë ditë të shenjtë për arsimin shqiptar, përulem me respekt para të gjithë mësuesve që, me përkushtim dhe dashuri, mbajnë gjallë dritën e dijes dhe të gjuhës shqipe në çdo cep ku jetojnë shqiptarët.

Urime të gjithë mësueseve dhe mësuesve shqiptarë kudo që janë!
Paçi gjithmonë forcën dhe përkushtimin për të ndezur tek brezat e rinj dashurinë për gjuhën, kulturën dhe atdheun tonë.

Gëzuar 7 Marsin!

 

---