Universiteti i Bernës fillon trajnimin për klerikët myslimanë

Kjo vjen si rezultat i kërkesave në rritje që kanë për këtë profil spitalet, burgjet dhe qendrat e azilit

Duke filluar nga vera e këtij viti, Universiteti i Bernës do të bëjë trajnimin e klerikëve myslimanë. Kjo vjen si rezultat i kërkesave në rritje që kanë për këtë profil spitalet, burgjet dhe qendrat e azilit, ka thënë për gazetën “Le Temps” Isabelle Noth, profesoreshë për lëndë pastorale dhe për psikologji të religjionit.

Ky lloj trajnimi i ri pritet që veç tjerash të parandalojë që klerikët myslimanë të predikojnë te besimtarët e feve tjera për t`i kthyer në islam. Veç kësaj një testim i paralajmëruar do të ndihmojë që tendencat radikale të kandidatëve të identifikohen me kohë.

Duke vendosur për trajnimin e klerikëve myslimanë, Universiteti i Bernës përmbush një rekomandim të bërë nga autoritetet federale, transmeton albinfo.ch. Në një raport të bërë nga i deleguari i federatës së autoriteteve të sigurisë në nivel të Zvicrës kishte bërë fjalë për nevojën për veprim në drejtim të krijimit të mundësive për trajnim të klerikëve myslimanë.

Ndërkaq, që nga vera e vitit të kaluar është duke u realizuar një projekt pilot me klerikët myslimanë në fushë të azilit. Qëllim i këtij projekti është që të testohet nëse në të ardhmen do të caktohen klerikë myslimanë në të gjitha qendrat federale të azilt.